Plantun de Prouvènço

Pèr coumpara dos planto d'encò nostre

Arenaria provincialis & Arundo donax

Arenaria provincialis

Caryophyllaceae

Nom en français : Sabline de Provence.

Descripcioun :
La lineto-de-Prouvènço es uno planto de l'an endemico que trachis en mato dins lis esboudèu e li tepiero roucaiouso di cresten. Fai de tijo primo emé quàsi ges de péu ; li fueio d'en bas soun en lanço, dessubre soun proun estrecho. Èi la souleto Arenaria a n'agué que dous estile (e pas tres). Lou boursèu, que se duerb quàsi pas, caup uno souleto grano berugouso. La planto èi marcado sus la listo roujo, categourìo NT, quàsi menaçado.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 20 cm
Fueio : óupousado
Tipe bioulougico : Teroufite
Cicle bioulougico : Planto de l'an

Gènre : Arenaria
Famiho : Caryophyllaceae

Ordre : Caryophyllales

Coulour de la flour : Blanco
Petalo : 5
Ø (o loungour) flour : 4 à 7 mm
Flourido : Printèms

Sòu : Ca
Autour basso e auto : 110 à 1100 m
Aparado : Noun
Remarco : Endemico de Prouvènço
Mars à jun

Liò : Esboudèu - Tepiero roucaiouso - Roucaio - Lapié
Estànci : Mesoumediterran
Couroulougi : Estenoumediterrano-Nord-Ouèst
Ref. sc. : Arenaria provincialis Chater & G.Halliday, 1964 (= Gouffeia arenarioides DC. )

Cano

Arundo donax

Poaceae Graminaceae

Autre noum : Canié.

Noms en français : Canne de Provence, Roseau à quenouilles.

Descripcioun :
La cano que ié dison "de Prouvènço" es uno plano bèn couneigudo emé si grando e gròssi tijo lignouso d'enviroun 3,5 cm de diamètre, si long rizoumo espès e si fueio verdalo de 2 à 5 cm de larg.

Usanço :
La cano que nous vèn dóu cèntre de l'Asìo, fuguè proun plantado pèr proutegi li culturo dóu mistral. Nòstis àvi se n'en servien pèr gaubeja mant'uno besougno : pèr eisèmple pèr apara li det dóu tai dóu voulame (li dedau) o enca pèr acroucha lou calèu (la moco). Lou rizoumo èi manjadis (li fueio peréu, mai soun proun amaro) cue (rousti o bouli) o adouba en farino pièi mesclado à d'autro. Emai èro pas gaire emplegado coume planto vertuouso, aro d'ùni prouprieta soun estado troubado coume dins la dessensibilisacioun pèr l'alergìo.